Сёння прадстаўнiкi амбасады ЗША, прадстаўніцтва ААН у Беларусі і Міністэрства замежных спраў Беларусі правялі цырымонію ўшанавання памяці амерыканкі Рут Уолер, члена Місіі Адміністрацыі дапамогі і аднаўлення ААН (ЮНРРА) у пасляваеннай Беларусі. Тэхнічная і харчовая дапамога ЮНРРА, асноўным укладчыкам якой з’яўлялiся ЗША, спрыяла пераадоленню ў Беларусi часоў разрухі, голаду і смутку.
4 жніўня 1946 года Рут Уолер памёрла ад хваробы, якая развілася пасля таго, як Рут выратавала тонучых беларускiх дзяцей. Амбасада ЗША ўшаноўвае Рут з сярэдзіны 1990-х. У 2015 годзе на будынку Лошыцкай сядзібы, дзе месцілася і працавала Місія, была ўстаноўлена мемарыяльная дошка ў яе гонар, а ў 2016 годзе мінскай школе №130 была прысвоена імя Рут Уоллер на ўрачыстай цырымоніі пры ўдзеле намесніка генеральнага сакратара ААН Хелен Кларк, дыпламатаў, беларускіх чыноўнікаў і шырокай грамадскасцi. Прадстаўнікі школы на чале з дырэктарам школы Дзмітрыем Бекцяшкіным сёння далучыліся да Паверанай у справах ЗША Джэніфер Мур, Пастаяннага каардынатара Арганізацыі Аб’яднаных Нацый Джааны Казаны-Вішнявецкай і Першага сакратара упраўлення Еўропы i Паўночнай Амерыкi Міністэрства замежных спраў Дзмітрыя Ілюхіна, каб ушанаваць Рут і справу, зробленую ЮНРРА.
